हेटौंडा । हेटौंडा–४,नम्बर वडा कार्यालयको आयोजनामा, नेपाल हृदय रोग निवारण प्रतिष्ठान मकवानपुरको सहअयोजनामा तथा मदन भण्डारी स्वास्थ्य विज्ञापन प्रतिष्ठानको विशेष सहयोगमा भएको निःशूल्क स्वास्थ्य शिविरमा ६ सय भन्दा बढी मानिस लाभान्वित भएका छन् । शनिबार हेटौंडा–४,स्थित बालकुमारी पार्टी प्यालेसमा भएको निःशूल्क स्वास्थ्य शिविरबाट ४ नम्बर वडाकासँगै अन्य विभिन्न क्षेत्रका ६ सय भन्दा बढी मानिसले शिविरमा सहभागिता जनाएर लाभान्वित भएका हुन् ।

निःशूल्क स्वास्थ्य शिविरमा मुटुरोग, स्त्रीरोग तथा क्षयरोग सम्बन्धी विशेषज्ञ सेवा, भिडियो एक्स–रे, ईसीजी, इको परीक्षण, छातीको एक्स–रे, पीएफटी (दम परीक्षण), सुगर तथा लिपिड प्रोफाइल परीक्षण, महिलाको पाठेघर तथा पाठेघरमुखको क्यान्सर परीक्षण, सामान्य स्वास्थ्य परीक्षण तथा परामर्श सेवा प्रदान गर्दै आवश्यकता अनुसारको बिरामीहरूलाई निःशुल्क औषधि वितरण समेत गरिएको थियो ।

नेपाल हृदयरोग निवारण प्रतिष्ठान मकवानपुरका वरिष्ठ उपाध्यक्ष ध्रुव भुजेलको अध्यक्षतामा भएको कार्यक्रममा बागमती प्रदेश सरकारका स्वास्थ्य मन्त्री माननीय किरण थापाको प्रमुख आतिथ्यता रहेको थियो । कार्यक्रममा प्रदेशसभा सदस्य एकलाल श्रेष्ठ, हेटौंडा–४ का अध्यक्ष नवीन सिग्देल, मदन भण्डारी स्वास्थ्य विज्ञान प्रतिष्ठानका रजिस्ट्रार भीमसागर गुरागाईं, टोल विकास संस्था नगर समन्वय समिति, हेटौंडाका अध्यक्ष ध्रुव प्रसाद अधिकारी लगायतको विशेष आतिथ्यता रहेको थियो ।

कार्यक्रमको उद्धाटन गरेर स्वास्थ्य मन्त्री किरण थापाले स्वास्थ्य सेवा नागरिकको आधारभूत अधिकार भएको उल्लेख गरे । उनले सरकार स्वास्थ्य सेवालाई नागरिकको पहुँचमा पुर्‍याउन प्रतिबद्ध रहेको बताउँदै यस्ता शिविरहरूले समयमै रोग पहिचान गरी उपचारमा सहजता ल्याउने तथा स्वास्थ्यप्रति जनचेतना अभिवृद्धि गर्ने विश्वास व्यक्त गरे ।

वडाध्यक्ष नवीन सिग्देलले वडा कार्यालयले नागरिकको स्वास्थ्य, शिक्षा र सामाजिक विकासलाई प्राथमिकतामा राख्दै विभिन्न जनमुखी कार्यक्रम सञ्चालन गर्दै आएको बताए । टोल विकास संस्था नगर समन्वय समितिका अध्यक्ष एवम् कार्यक्रम व्यवस्थापक ध्रुव प्रसाद अधिकारीले स्वस्थ नागरिक नै समृद्ध समाजको आधार भएको उल्लेख गरे । उनले समुदायस्तरमा स्वास्थ्य सचेतना अभिवृद्धि गर्न यस्ता कार्यक्रमलाई आगामी दिनमा पनि निरन्तरता दिइने बताए । उनले शिविर सफल बनाउन सहयोग गर्ने सम्पूर्ण संस्था, चिकित्सक, स्वास्थ्यकर्मी, स्वयंसेवक, सञ्चारकर्मी तथा सहभागी नागरिकप्रति हार्दिक आभार व्यक्त गरका थिए । शिविरमा विशेषज्ञ चिकित्सकहरूको टोली, स्वास्थ्यकर्मी, स्वयंसेवक तथा स्थानीय जनप्रतिनिधिहरूको सक्रिय सहभागिता रहेको थियो। आयोजकका अनुसार शिविरले समुदायका नागरिकलाई सहज, सुलभ र गुणस्तरीय स्वास्थ्य सेवा उपलब्ध गराउन महत्वपूर्ण योगदान पुर्‍याएको छ ।

कार्यक्रम सफलतापूर्वक सम्पन्न भएपछि आयोजक संस्थाहरूले भविष्यमा पनि यस्ता सामाजिक तथा स्वास्थ्यसम्बन्धी कार्यक्रमहरूलाई निरन्तरता दिने प्रतिबद्धता व्यक्त गरेका छन्।

रातो समाचार संवाददाता
थप जानकारी